2Cor 6 | HOT | STEP | Yêlô lôk Wapômbêŋ adum ku haviŋ i. Yani hanaŋ, “Bôk yahatak wak te yôv ek yanêm môlô sa. Ba môlô olaŋ ma yahalaŋô ba yahêv môlô bulubiŋ yôv.” Môlô bôk owa Wapômbêŋ anêŋ wapôm yôv. Ba intu yêlô asoŋ môlô lokwaŋ, “Lêk êntêk hêv môlô sa. Lêk êntêk hêv môlô bulubiŋ.” Ba intu miŋ nundum ku êŋ imbitak êtôm nôm oyaŋ ami.

aAisaia 49:8

b 6:4-52Ko 11:23-27

c 6:61Ti 4:12

d 6:92Ko 4:10

e 6:131Ko 4:14

f 6:14Ep 5:11

g 6:161Ko 3:16

hWok Plis 26:12

i 6:17ALK 18:4

jAisaia 52:11; Esekiel 20:34,41

k 6:18Jer 31:9

l2 Samuel 7:8, 14

2 Corinthians 6

1 Yêlô lôk Wapômbêŋ adum ku haviŋ i. Yani hanaŋ,

“Bôk yahatak wak te yôv ek yanêm môlô sa.
Ba môlô olaŋ ma yahalaŋô
ba yahêv môlô bulubiŋ yôv.” ^a
Môlô bôk owa Wapômbêŋ anêŋ wapôm yôv. Ba intu yêlô asoŋ môlô lokwaŋ, “Lêk êntêk hêv môlô sa. Lêk êntêk hêv môlô bulubiŋ.”

Ba intu miŋ nundum ku êŋ imbitak êtôm nôm oyaŋ ami.

Aposel ewa malaiŋ bêŋ hathak iniŋ ku

3 Yêlô adô ek anyôla enaŋ abôma esak Wapômbêŋ anêŋ ku. Ba intu adum ku êŋ ek miŋ nambuliŋ avômalô iniŋ auk ami. 4 ^bYêlô ma Wapômbêŋ anêŋ ŋê ku. Ba intu yêlô awa iniŋ ku mavi takatu sa hadêŋ môlô. Yêlô awa vovaŋ lôk malaiŋ hathak ku êntêk ba hakakô yêlô kambom. Epetav yêlô lôk etak yêlô halôk koladôŋ ma êkôki hathak abô. Yêlô adum ku lôk vovanik bêŋ ba aêv lêlê lôk nôm mi ba ama kisi. Malaiŋ nômbêŋ êntêk hapôm yêlô ma doŋtom amiŋ lôklokwaŋ. 6 ^cLovak Matheŋ hamô haviŋ yêlô ba ayala Wapômbêŋ anêŋ auk ba kapôlôŋiŋ ida hêk mabuŋ ma yêlô ŋê maliŋyaô lôk yôhôk ma wapôm. Ma yêlô leŋiŋhaviŋ avômalô ba miŋ asau thêlô ami. 7 Yêlô anaŋ abô avanôŋ iyom haviŋ Wapômbêŋ anêŋ lôklokwaŋ lôk avaloŋ anêŋ thêthôŋ hatôm nômkama vovak hamô baheŋ luvi. 8 Avômalô vi ebam yêlô ma vi etatale yêlô. Doho enaŋ abô mavi hathak yêlô ma doho enaŋ abôma. Yêlô ŋê abô anôŋ iyom ma doŋtom avômalô vi elam yêlô nena ŋê abôyaŋ. 9 ^dAvômalô pik êthôŋ yêlô paliŋ ma doŋtom Wapômbêŋ hayala yêlô. Yêlô adum ek nama ma doŋtom nôŋgô, lêk amô lôkmala. Ik yêlô kambom ma doŋtom miŋ ama ami. 10 Leŋiŋmalaiŋ ma doŋtom leŋiŋmavi wak nômbêŋ intu. Yêlô ma ŋê nômkama mi ma doŋtom adum ba avômalô bêŋ anôŋ ibitak ŋê lôk nômkama bêŋ. Yêlô nômkama mi ma doŋtom nômkama sapêŋ ma yêlôaniŋ.

11 O yenaŋ avômalô Kolin! Yêlô anaŋ abô lôkthô hi yaiŋ ek môlô ma yêlô kapôlôŋiŋ hik i ek môlô nôlêm. 12 Yêlô miŋ avasiŋ kapôlôŋiŋ ek môlô ami. Mi. Môlô da. 13 ^eAêŋ ba yahanaŋ hadêŋ môlô hatôm lambô hanaŋ hathak nakaduŋ. Malêla takatu ba yêlô adum hathak môlô ma nundum aêŋ iyom lôk nodate kapôlômim ek yêlô.

Ŋê daluk lôk ŋê êvhaviŋ miŋ nesak doŋtom ami

14 ^fMôlô miŋ nômô imbiŋ ŋê daluk ami. Thêthôŋ lôk lokbaŋ hatôm doŋtom e? Deda lo momaŋiniŋ hatôm doŋtom e? 15 Sadaŋ Belial lo Kilisi hatôm leŋiŋmavi imbiŋ i e? Mena ŋê êvhaviŋ lo ŋê daluk hatôm nesak doŋtom e? 16 ^gMa Wapômbêŋ anêŋ unyak matheŋ lôk ŋgôkba hatôm nêmô imbiŋ i e? Milôk. Alalô ma Wapômbêŋ lôkmala anêŋ unyak matheŋ hatôm anêŋ abô hanaŋ,

“Tem yamô lôk yambeŋ imbiŋ i
ma ya tem êtôm thêlôniŋ Wapômbêŋ
ma thêlô tem nimbitak yenaŋ avômalô. ^h
17 ⁱAêŋ ba notak avômalô takêŋ ma nômô daim.
Ma miŋ nobaloŋ lelaik takêŋ ami ek batu yanja môlô thô. ^j
Ya Anyô Bêŋ yahanaŋ aêŋ.
18 ^kYa tem yambitak môlônim lemambô
ma môlô tem numbitak êtôm yenaŋ okna lo avena. ^l
Ya Anyô Bêŋ Lôklokwaŋ yahanaŋ aêŋ.”